E Naturalesa “Sekreto” di e Sinku Prinsipionan di Yoga, Part 3


Yoga ta simplemente un práktika di salú i relahamentu òf su origen, naturalesa, i propósito ta unu mas profundo?


Den e di tres parti aki di nos estudio nos ta sigui konsiderá e 5 Puntonan (Prinsipionan) di Yoga. Nos ta trata akinan e di tres prinsipio: Relahamentu Apropiá (Savasana).


Relahamentu Apropiá

E di tres prinsipio di Yoga ta, Relahamentu Apropiá (Savasana). Tin tres método ku ta wòrdu usá pa yega na un relahamentu kompletu. Esakinan ta: 1. Relahamentu Físiko, 2. Relahamentu Mental, i 3. Relahamentu Spiritual. Mi kier pa nos para ketu un ratu na e último aki, esta Relahamentu Spiritual.


Guru Swami Vishnu-devananda a bisa asin'aki, “No importá kon un persona trata di relahá e mente, tur tenshon i prekupashon no por wòrdu kita kompletamente te ku ora e persona alkansá relahamentu spiritual.” Mi ta kompletamente di akuerdo akinan ku Vishnu-devananda su rekonosementu di e importansia di e estado spiritual di e persona. Ma tende kiko e ta sigui bisa,


“E yogi (praktikante di Yoga) ta identifiká su mes ku esun ku ta yena tur kos, e todo-poderoso, e todo-pasífiko, i gososo self, òf konsiensia puru interno. E sa ku e fuente di tur poder, konosementu, pas i forsa ta den e self, no den e kurpa. Nos ta afiná na esaki dor di afirmá e naturalesa real, esta ku ‘T’ami ta e konsiensia puru ei òf e self.’ E identifikashon ku e self aki ta kompletá e proseso di relahamentu.”


E self ku Guru Vishnu-devananda ta papia di dje akinan, i ku kua e praktikante di Yoga tin di identifiká ta e dios di hinduismo panteista. Pues loke Vishnu-devananda ta bisando, ta ku nos ta alkansá relahamentu spiritual, relahamentu perfekto, ora nos realisá ku nos ta dios.


Nos ta Dios?

Esaki ta un pensamentu totalmente falsu i apsurdo; un falsedat klaramente komprendibel pa kada unu ku ta kapas na simplemente usa nan sentido rashonal i lógiko. Den su buki The Case for Christ, e zjurnalista Lee Strobel ta relatá su entrevista ku Louis Lapides, un Hudiu mesianiko. Strobel ta skirbi asin'aki,


“Tabata na 1969. E kuriosidat di Lapides a hib’é na bai bishitá Sunset Strip pa hasi bofon di un evangelista ku a mara su mes na un krus di ocho pia pa protestá e manera ku doñonan di bar a logra kore kuné for di su negoshi. Einan riba alsera Lapides a topa algun Kristian ku a drenta den un debate spiritual kuné.


Ku un tiki arogansia, el a kuminsá manda filosofia Oriental riba nan. ‘No tin niun Dios eifó,’ el a bisa, mustrando na shelu. ‘Ta nos ta Dios. Ami ta Dios. Bosnan ta Dios. Bo tin ku simplemente realisá esei.’

‘Wèl, si bo ta Dios, dikon bo no ta krea un baranka?’ un persona a kontestá. ‘Djis laga algu aparesé. T’esei ta loke Dios ta hasi.’ Den su mente drogá Lapides a imaginá ku e tabata tene un baranka. ‘Si, wèl, ata un baranka’ki,’ el a bisa, ekstendiendo su man bashí.


E Kristian a hari. ‘T’esei ta e diferensia entre abo i e berdadero Dios,’ el a bisa. ‘Ora Dios krea algu, tur hende por mir’é. E ta ophetivo, no suphetivo.’ E palabranan ei a pone Lapides para ketu. Despues di a pensa riba e asuntu un ratu, el a bisa su mes, ‘Si mi haña Dios, e mester ta ophetivo. Mi ta kla ku e filosofia Oriental’aki ku ta bisa ku tur kos ta den mi mente i ku mi por krea mi propio realidat. Dios mester ta un realidat ophetivo, si e mester tin kualke nifikashon mas leu ku mi propio imaginashon.’”


Nos ta haña den e relato aki un fuerte argumento rashonal i lógiko kontra e pensamentu ku nos ta dios. Konsekuentemente, e método ku praktikantenan di Yoga ta presentá pa e ser humano alkansá relahamentu spiritual, ta un método basá riba un mentira, un fantasia.


Berdadero Relahamentu Spiritual

Pero, e ta posibel pa hende bin eksperensiá relahamentu spiritual? Si! Den Beibel, kua ta e úniko skrituranan ku a proba di ta altamente konfiabel i divinamente inspirá, nos ta lesa eksaktamente kon esaki por tuma lugá. Den Mateo 11:28-30 Hesus ta bisa asin’aki,


“Bin serka Mi tur ku ta kansá i kargá, i lo Mi duna boso sosiegu. Tuma Mi yugo riba boso, i siña di Mi, pasobra Mi ta mansu i umilde di kurason; i boso lo haña sosiegu pa boso alma. Pasobra Mi yugo ta suave i Mi karga ta lihé.”


Esaki no ta e palabranan di un guru òf un simpel lider religioso; nan ta e palabranan di unu infinitamente elevá; unu kua su konsebimentu, su nasementu, su naturalesa, su obranan, i su siñansanan nunka a ser igualá, i nunka tampoko lo por ser igualá. Mi ta papiando’aki di e úniko i perfekto Lamchi di Dios ku a duna Su bida, p’asina hende por tin bida. Mi ta papiando’aki di e úniko ku a triunfá riba graf i morto; mi ta papiando’aki di Hesus, kende ta e úniko i perfekto Salbador di mundu. Ta e ta esun ku por, i ke duna nos sosiegu.


Den e di kuater parti di e estudio nos lo sigui analisá e otro puntonan (prinsipionan) di Yoga. Si bo ke lesa e di dos parti di e estudio aki, klik aki. Konsiderá pa registrá pa un di nos kursonan den apologia. Asinaki lo bo risibí un preparashon sistemátiko i na nivel, i tambe lo bo sostené e website aki.

25 views0 comments

Recent Posts

See All