E Naturalesa “Sekreto” di e Sinku Prinsipionan di Yoga, Part 2


Yoga ta simplemente un práktika di salú i relahamentu òf su origen, naturalesa, i propósito ta unu mas profundo?


Den e di dos parti aki di nos estudio, nos ta kuminsá wak e 5 Puntonan (Prinsipionan) di Yoga. Nos ta trata e promé dosnan: Ehersisio Apropiá (Asanas) i Respirashon Apropiá (Pranayama).


Ehersisio Apropiá

E término Asanas ta nifiká posishon (postura) firme. Esaki ta pasobra durante ehersisionan di Yoga e praktikante mester mantené e posishonnan (posturanan) aki pa un periodo di tempu. Segun Swami Vishnu Devananda, nan skrituranan ta kontené 8.400.000 Asanas (postura). Ma tin 12 postura básiko ku ta trese e esensia i resultadonan prinsipal di e sistema. Esakinan ta:


1. Para riba kabes

2. Para riba skouder

3. Plug

4. Piská

5. Dobla kurpa dilanti sintá

6. Kobra

7. Dalakochi

8. Bog

9. Twist lomba

10. Postura di e raf òf Postura di e pòwis

11. Dobla kurpa dilanti pará

12. Triangulo


E ehersisionan físiko den Yoga ta enfoká riba e salú di e wesu di lomba; su forsa i fleksibilidat. Sinembargo, ta un eror pa mira e ehersisionan aki komo meramente práktikanan físiko. Riba su website, Guru Swami Vishnu Devananda, e fundadó di International Sivananda Yoga Vedanta Centers, ta bisa asin’aki, “E ehersisionan físiko di Yoga ta diseñá no pa mehorá solamente e kurpa. Nan ta amplia tambe e fakultatnan mental i e kapasidatnan spiritual.”


Tradishonalmente, promé ku e praktikantenan di Yoga kumisá ku e Asanas, esta e ehersisionan físiko, nan ta praktiká e asina yamá kumindamentu na solo. Den mitologia Hindú, e solo ta wòrdu konsiderá komo un dios, i ta wòrdu adorá komo un símbolo di salú i inmortalidat. E kumindamentu na solo, manera esaki ta wòrdu praktiká dor di praktikantenan di Yoga, ta konsistí di 12 posishon (postura), kada unu selebrando un aspekto di e supuesto divinidat di solo.


Den Romanonan 1:25 nos ta lesa ku hende “a kambia e bèrdat di Dios pa un mentira i a adorá i sirbi e kriatura enbes di e Kreador, Kende ta bendishoná pa semper.” Solo ta algu finito, e ta algu ku tabatin un kuminsamentu, pues e ta meramente un kreashon di e úniko Dios berdadero i infinito. Den Isaias 45:5-6 Señor mes ta bisa, “Ami ta SEÑOR i no tin ningun otro; fuera di Mi no tin Dios. Lo Mi fahabo, ounke bo no a konoséMi, pa hende por sa for di ora solo sali te ora ku e drenta, ku no tin ni un otro fuera di Mi. Ami ta SEÑOR, i no tin ningun otro.” E Shema, e deklarashon di fe di e Hudiunan, ta bisa “Tende, O Israel! SEÑOR ta nos Dios, SEÑOR ta ún!”(Deu.6:4). Den Ezekiel 8:16 e profeta ta bisa,


“E ora ei El a hibami na e plenchi paden di e kas di SEÑOR. I mira, na entrada di e tèmpel di SEÑOR, entre e veranda i e altar, tabatin mas o menos bint'i sinku hòmber ku nan lomba pa tèmpel di SEÑOR i ku nan kara den direkshon pariba. I nan tabata bùig te na suela, kara pariba, den direkshon di solo” (enfasis, di mi).


Ku nan práktikanan, praktikantenantenan di Yoga ta birando nan lomba pa e úniko i berdadero Dios, i ta duna adorashon na solo, kua ta un akto idolatrá. I no tin nada den idolatria ku lo por ta di benefisio berdadero i duradero pa e kurpa, mente, i spiritu di hende. Loke bo sembra, esei bo ta kosecha.


Na final di e ehersisionan di Yoga, praktikantenan ta tuma e asina yamá Postura di e Kurpa Sin Bida. Esaki ta pa supuestamente rehubenesé kurpa, mente, i spiritu, i baha stress i tenshon.


Respirashon Apropiá

E di dos prinsipio di Yoga ta, Respirashon Apropiá (Pranayama). Prana ta nifiká bida (energia di bida) i tambe rosea. Yama ta nifiká kontròl. Pues algun ta tradusí pranayama komo e “kontròl di rosea.” E palabra ayama ta nifiká ekspanshon òf kresementu; asin’ei pues, un otro tradukshon di pranayama ta “ekspanshon di e forsa di bida.”


Den Yoga, praktikantenan ta trata na apsorbá e prana (e forsa di bida) tur ku ta posibel, dor di loke nan ta kome, loke nan ta mira, loke nan ta tende; ma prinsipalmente dor di e manera di hala rosea (pranayama). Tin vários téknika di pranayama, kada un ku nan propio supuesto benefisionan. Lagami djis menshoná algun di e téknikanan: Dirgha Pranayama, Ujjayi Pranayama, Nadi Shodhana, Kapalabhati, i Analoma Veloma.


Den e di tres parti di e estudio nos lo sigui analisa e otro puntonan (prinsipionan) di Yoga. Si bo ke lesa e promé parti di e estudio aki, klik aki.

20 views0 comments

Recent Posts

See All