Nos ta kere den e outoridat i konfiabilidat di Skritura:

Nos ta kere ku “tur Skritura ta inspirá pa Dios” esta, ku inspirashon divino ta ekstendé igualmente i kompletamente na kada parti di e eskritonan, manera esakinan ta aparesé den e manuskritonan original. Nos ta kere ku henter Beibel den e originalnan ta sin ningun eror (1 Kor. 2:13; 2 Tim. 3:16).

 

Nos ta kere den e Trinidat:

Nos ta kere ku Dios ta eksistí eternamente den tres persona – e Tata, e Yu, i e Spiritu Santu – i ku e tresnan aki ta un Dios, teniendo eksaktamente e mesun naturalesa, atributonan, i perfekshonnan, i siendo digno di eksaktamente e mesun adorashon, konfiansa, i obedensia (Mat. 28:18-19; 2 Kor. 13:13).

 

Nos ta kere den e deidat i humanidat kompletu di Hesukristu:

Nos ta kere ku Hesus a nase di un birgen, i a risibí un kurpa humano i un naturalesa humano liber di piká. El a bira i a permanesé un hòmber perfekto, i tabata henter Su bida sin piká. El a retené su deidat apsoluto, siendo na mes momento kompletamente Dios i kompletamente hende (Luk. 2:40; Huan 1:1-2; Fil. 2:5-8).

 

Nos ta kere den e degenerashon kompletu i e kaida spiritual di e rasa humano:

Nos ta kere ku originalmente hende a wòrdu kreá den e imagen di Dios i segun e semehansa di Dios, i ku el a kai dor di piká, i, komo konsekuensha di su piká, a pèrde su bida spiritual, birando morto den transgreshonnan i piká, i ku el a bira sometí na e poder di Satanas. Nos ta kere ku e morto spiritual aki, òf degenerashon kompletu di e naturalesa humano, a wòrdu transmití na henter e rasa humano, e hende Kristu Hesus so siendo un eksepshon; i komo tal tur yu di Adam ta nase riba mundu ku un naturalesa ku no solamente ta karesé di un chispa di bida divino, pero ta esensialmente i inkambiablemente pekaminoso aparte di grasia divino (Gen. 1:26; Rom. 3:10-19; 8:6-7; Efe. 2:1-3).

 

Nos ta kere den e sakrifisio supstitushonario i resurekshon físiko di Hesukristu:

Nos ta kere ku segun e Skrituranan, Hesukristu a muri pa nos pikánan i a lanta bèk for di morto den e mesun kurpa, anke glorifiká, den kua El a biba i muri, i ku Su kurpa resusitá ta e patronchi di e kurpa ku finalmente tur kreyente lo risibí (Huan 20:20; Fil. 3:20-21).

 

Nos ta kere den salbashon pa medio di unikamente fe i den unikamente Hesukristu:

Nos ta kere ku niun hende no por drenta e reino di Dios si e no a nase di nobo i ku niun grado di fabor no por wòrdu atkerí pa yuda e pekadó dal sikiera un stap direkshon di shelu; pero ku un naturalesa nobo ku ta bini di ariba, un bida nobo duná pa e Spiritu Santu dor di e Palabra, ta apsolutamente esenshal pa salbashon. E renasementu di e kreyente ta bini solamente dor di fe den Hesukristu (Huan 3:7-18; Rom. 5:6-9).

 

Nos ta kere den e siguransa di salbashon:

Nos ta kere ku e ta e privilegio di tur ku a nase di nobo dor di e Spiritu pa medio di fe den Kristu pa ta sigur di nan salbashon for di e momentu ku nan a tum’E komo nan Salbador, i ku e siguransa aki ta basá kompletamente riba e testimonio di Dios den Su Palabra (Luk. 10:20; 2 Kor. 5:1, 6-8).

 

Nos ta kere den e kaná Kristian:

Nos ta kere ku nos ta yamá ku un yamada santu, pa kana no segun e karni, ma segun e Spiritu, i asina pa biba den e poder di e Spiritu den nos pa asina nos no kumpli ku e deseonan di e karni (Rom. 6:11-13; 8:2,4,12-13; Gal. 5:16-23).

 

Nos ta kere den e regreso prémilenial i físiko di Kristu:

Nos ta kere ku e siglo aktual lo yega su klimaks ku e regreso di Señor Hesukristu aki na mundu na mes manera ku El a bai, pa restourá Israel den su propio tera i pa duné e realisashon di Dios su promesanan di aliansa, i pa trese henter mundu na e konosementu di Dios (Deut. 30:1-10; Ezek. 37:21-28; Mat. 24:15-25; Rev. 20:1-3).

​