Yoga ta simplemente un práktika di salú i relahamentu òf su origen, naturalesa, i propósito ta unu mas profundo?
E 5 Puntonan di Yoga
Mirando e popularidat di e praktika di Yoga i e falta di informashon tokante esaki su naturalesa mas profundo, den e blog aki lo mi ke kuminsá trata e 5 Puntonan di Yoga. E 5 puntonan (prinsipionan) aki ta e esfuerso di Guru Swami Vishnu-devananda pa simplifiká i klarifiká e filosofianan i siñansanan kompleho di Yoga. E 5 puntonan aki ta:
1. Ehersisio Apropiá (Asanas)
2. Respirashon Apropiá (Pranayama)
3. Relahamentu Apropiá (Savasana)
4. Dieta Apropiá
5. Pensamentu Positivo (Vedanta) i Meditashon (Dhyana)
E palabra Yoga ta nifiká Union. Ma awor union entre kiko? Hopi hende ta pensa, eróneamente, ku ta entre kurpa i mente, òf entre kurpa, mente, i spiritu. Konsekuentemente, hopi, atrobe eróneamente, ta mira Yoga komo meramente un práktika di salú i relahamentu. Tradishonalmente e tèrmino Yoga ta referí na e union entre e Jivatman i e Paramatman, esta, entre e Konsiensia Individual di un persona i e Konsiensia Universal. Riba su website, Guru Swami Vishnu-devananda mes ta bisa lo siguiente, “Yoga te referí na un sierto estado di konsiensia i tambe na métodonan ku ta yuda un hende alkansá e meta òf estado di union ku e divino.”
Yoga, Hinduismo, i Beibel
Pues, e meta final di Yoga ta unu spiritual, i ankrá den e religion Hindú. Nos tin di nota lo siguiente:
1. E konsepto di dios ku e Hindúnan tin, ta unu totalmente diferente for di loke nos ta haña revelá tokante di Dios den Beibel. E dios Hindú ta unu impersonal, e ta e totalidat i unidat di henter e universo. Sinembargo e Dios ku nos ta lesa di dje den Beibel ta personal; e Dios aki ta envolví den tur asuntu humano i ta demostrá Su hustisia i grasia. Pues, praktikantenan di Yoga, si nan kier ta konsistente ku e filosofia for di kua nan práktika ta sali, no mester referí na dios komo Tata, nan no mester hasi orashon pa yudansa divino, i nan no mester spera amor, grasia, i miserikòrdia for di dios. Pasobra e dios Hindú no konosé esakinan.
2. Hende ta un ser personal i moral; e universo ta algu impersonal i no-moral. Pregunta: E loke ta personal i moral por a sali for di algu impersonal i ku no konosé moralidat? Kontesta: No! Pues e dios di Hinduismo, e dios na kua e filosofia di Yoga ta mará na dje, esta e universo, no por ta e fuente for di kua e ser humano a haña su eksistensia. Na otro’un banda, e Dios di Beibel ta un Ser personal i moral di Kende ta wòrdu skirbi ku El a krea e ser humano den Su imágen i semehansa. Esaki perfektamente ta splika dikon hende ta un ser personal i moral, algu ku Hinduismo i e filosofia di Yoga no por hasi.
3. Tin pruebanan tantu filosófiko komo sientífiko ku ta mustra ku e universo tabatin un kuminsamentu. Pues mester tin algu pafó di e universo, i muchu mas grandi ku e universo ku a kousa esaki su eksistensia. Mester tin un Ser sin kuminsamentu ku a kousa e eksistensia di tur loke tin un kuminsamentu. Ku otro palabra, mester tin un Ser infinito ku a trese tur loke ta finito na eksistensia. Beibel ta papia di un Dios infinito, ma Hinduismo i e filosofia di Yoga ta papia di un dios finito. I siendo esaki e kaso, e dios di Hinduismo i Yoga en realidat no ta Dios.
No tin niun klase di evidensia ku ta mustra ku un praktikante di Yoga, òf un Guru a yega di alkanse un supuesto estado di unidat ku dios. Na otro’un banda, tin relatonan altamente konfiabel di testigunan ku a bisa ku Hesukristu a hiba un bida perfekto. Den 1 Pedro 2:22, referiendo na Hesus, e apòstel ta bisa, “Kende no a kometé piká, ni mentira no a wòrdu hañá den Su boka” (enfasis di mi). I den 1 Juan 3:5, papiando di Hesus, e apòstel ta bisa, “I boso sa ku El a paresé pa kita piká; i den djE no tin piká” (enfasis di mi).