Nostradamus & E Coronavirus


“Lo bai tin un aña ohochi for di kua lo lanta un reina kende lo bini for di oriente i kende lo plama un plaga den e skuridat di anochi, riba un pais ku 7 seru i lo transformá e twilight di hende den stòf, pa destruí i hiba mundu na ruina. E lo ta e fin di e ekonomia mundial manera bo konosé.”



E Predikshon di Coronavirus

Probablemente bo tambe a tuma nota di e mensahe aki ku a bin ta sirkulá riba medionan di komunikashon. Segun ta wòrdu bisá, esaki ta un predikshon ku Nostradamus a hasi tokante e Coronavirus. Segun e interpretashon, “aña ohochi” lo ta referí na “aña 2020,” “oriente” ta referí na “China,” “plaga” ta referí na e “Coronavirus,” “un pais ku 7 seru” ta referí na “Italia,” i “stòf” ta referí na “morto.” E pregunta ku naturalmente ta surgi, ta ku si Nostradamus enbèrdat a duna predikshon di e Coronavirus. Promé ku nos kontestá e pregun’aki, laga nos para ketu un ratu na e persona di Nostradamus i su predikshonnan.

Nostradamus, Predikshonnan & Skritura

Sigur e eskritonan mas konosí di e Franses, Michel de Nostradamus ta su asina yamá “siglonan” kua a wòrdu publiká pa promé bia na aña 1555. Un “siglo” tabata un grupo di 100 predikshon, kada unu skirbí den kuater liña, kua ta wòrdu yamá un quatrain. Tabata na aña 1555 tambe ku Nostradamus a kuminsá bisa ku e tabata divinamente inspirá, esta ku su predikshonnan tabata bini di Dios. Esaki, sigur, ta algu masha serio mes pa bisa.

E Tèst di Skritura

Den Deuteronomio 18:22 , nos ta tende di Señor mes kon nos por rekonosé un profeta falsu; e versíkulo ta bisa: “Si un profeta papia den nòmber di SEÑOR i e kos no sosodé ni bira realidat, esei ta loke SEÑOR no a papia. E profeta a papia esaki ku tribilidat; no tene miedu di djé.” Pues un profeta di Dios ta unu ku na promé lugá, ta profetisá asina detayá i kla ku por wòrdu verifiká si loke el a bisa a sosodé òf nò; i na di dos lugá tur su profesianan tin un grado di 100 % di akures. Wèl, tene e bèrdatnan aki na kuenta miéntras nos ta analisá algun di e predikshonnan di Nostradamus.

Predikshon: E Morto di Henry II

Tabata na aña 1559 ku Nostradamus realmente a kue fama, ora e rei di Fransia Henry II, a muri na un manera ku supuestamente a wòrdu profetisá dor di Nostradamus. Esaki ta loke Nostradamus a skirbi algun aña promé,

“E leon yòn lo derotá e leon bieu,

Riba e tereno di bataya den un solo kombate:

E lo destruí su wowonan den un kouchi di oro,

Dos herida den unu, despues pa muri, un morto kruel.”

Nota e manera kríptiko den kua Nostradamus ta skirbi. Wak djis algun pregunta ku nos por hasi enkuanto e teksto: Kiko òf ken e kier mèn ku “leon yòn” i “leon bieu”? Nos mester tuma e frase “kouchi di oro” literalmente òf figurativamente? I si e ta figurativo, ta na kiko e ta referí?

Laga nos wak awor te kon leu e predikshon aki ta kuadra ku loke realmente a sosodé. Durante e selebrashon di un dòbel matrimonio, e rei di Fransia Henry II a kompetí kontra Gabriel di Montgomery, pa wak kua lo por a benta otro for di kabai ku uso di un lansa. Durante e kompetensia, e lansa di Gabriel a kibra i un splenter a drenta e hèlm di Henry, bora su kabes nèt riba su wowo drechi, i penetrá su selebre. Dies dia despues e rei a muri. Mi no ta kere ku Nostradamus a profetisá e suseso aki niun ora so, pa e siguiente motibunan:

  1. Nostradamus ta bisa ku “e leon yòn lo derotá e leon bieu,” hopi hende a tuma esaki komo referensianan na Henry II i Gabriel di Montgomery, pero den su buki titulá E Máskara di Nostradamus, James Randi ta bisa ku e Fransesnan nunka a usa e leon komo símbolo di monarkia. Nan símbolo tabata e gai.

  2. Den e di dos liña, Nostradamus ta bisa ku e derota lo tuma lugá riba tereno di bataya. Pero e realidat ta ku e suseso trágiko aki no a tuma lugá riba un tereno di bataya. Mas bien e tabata den kuadro di un selebrashon, durante un kompetensia amistoso.

  3. Den e di tres liña nos ta lesa, “E lo destruí su wowonan den un kouchi di oro.” Pero e echo ta ku e splenter no a penetrá niun di e wowonan di Henry, ma mas bien su kabes. Tampoko e “kouchi di oro” por wòrdu interpretá komo e hèlm di Henry, pa e simpel echo ku e hèlmnan no tabata wòrdu traha di oro, ku eksepshon di e emblema òf dekorashonnan riba dje.

Predikshon: E Morto di Adolf Hitler

Pues si esaki tabata e kousa inisial pa Nostradamus su fama, su fama tabata mal fundá. Tambe ta wòrdu bisá ku Nostradamus a skirbi tokante e morto di Adolf Hitler. E predikshon pa esaki lo mester ta e siguiente quatrain,

“Bestianan loko di hamber lo landa den riunan,

Mayoria di e sòldatnan lo ta den e Danube Menor.

Esun grandi lo wòrdu lastrá den un kouchi di heru,

Ora e chikitu di ruman lo mira nada.”

Esaki ta otro predikashon ku por wòrdu interpretá den 1001 manera, lokual ya ta sufiente motibu pa nenga di tuma e quatrain komo un profesia legítimo. Algun otro motibu dikon esaki no tabata un predikshon tokante e morto di Adolf Hitler:

  1. Henry C. Roberts ta bisa den su buki titulá E Profesianan Kompletu di Nostradamus, ku e predikshon aki ta papia di e destino di Hitler. E ta interpretá e “kouchi di heru” komo e bunker na Berlin den kua Hitler a muri. Pero e bunker no tabata di heru, ma di blòki.

  2. Den tempunan Romano e parti mas abou di e Riu Danube tabata wòrdu yamá “Ister” òf “Hister.” Den e film E Hòmber ku a Mira Mañan, Orson Welles ta komentá riba esaki i ta bisa ku “Hister” ta referí na Hitler, pero ku Nostradamus a faya den un lèter. Segun Orson Welles e fayo aki ta masha komprendíbel. Pero manera nos a mira kaba, Dios mes ta bisa ku e profeta ku ta papia den Su nòmber, no ta 80%, ni 90%, ni 99%, ma 100% korekto.

  3. Tambe nos tin di nota ku e predikshon no ta menshoná “Hister,” ma “Danube.” Aparte di esaki, den un predikshon ku el a duna na Novèmber di 1554, Nostradamus einan tambe ta usa e palabra “Hister,” pero mesora e ta bisa ku esaki tambe ta wòrdu yamá “Danube.” Pues por lo menos akinan, “Hister” i e “Riu Danube” ta e mesun kosnan pa Nostradamus.

Kustionando E Predikshon Tokante E Coronavirus

Laga nos bai bèk awor na e supuesto predikshon tokante e Coronavirus.

E Predikshon

“Lo bai tin un aña ohochi for di kua lo lanta un reina kende lo bini for di oriente i kende lo plama un plaga den e skuridat di anochi, riba un pais ku 7 seru i lo transformá e twilight di hende den stòf, pa destruí i hiba mundu na ruina. E lo ta e fin di e ekonomia mundial manera bo konosé.”


Análisis di e Predikshon

E promé kos ku mesora nos ta nota ta e estilo kríptiko di e “predikshon.” Esaki ya kaba ta hasi imposibel pa tuma e teksto aki komo un predikshon kla i esklusivo tokante COVID-19. E realidat ta ku nos por interpretá e teksto na diferente manera. Por ehèmpel, na kua aña eksaktamente e frase “un aña ohochi” ta referí? Si ta Nostradamus mes a skirbi e palabranan aki den siglo 16, e frase en kuestion lo por ta referí na e.o. 1616, 1717, 1818, 1919, 2020, 2121, etc. Esaki ta djis un ehèmpel chikitu.

E problema ku e “predikshon” aki no ta solamente riba tereno di interpretashon, ma tambe pa loke ta trata outentisidat. T’asina ku e pasahe aki no ta aparesé den ningun literatura skirbí pa Nostradamus. Segun e fact-checking website Snopes, e predikshon aki no ta genuino. Snopes ta bisa, “E predikshon viral partikular aki no a wòrdu ekspresá den forma di un quatrain, tampoko nos no por a haña nada similar na dje publiká den “Les Prohéties.” Nan ta sigui bisa, “Tampoko nos no a haña menshon di e supuesto profesia aki promé ku e eventonan di komienso di 2020, lokual generalmente ta indiká ku esaki ta un hoax moderno.”

Nos ta keda te akinan awe pa loke ta trata Nostradamus, su predikshonnan, i loke ta wòrdu atribuí na e hòmber aki.

30 views0 comments

Recent Posts

See All