E Esklusividat di Jesus


Ta bèrdat ku hòmbernan manera Herkules, Rama, Mitra, Krishna, i Buda tabatin e spiritu di Kristu, e asina yamá Konsiensia di Kristu? Aparte di Jesus, tabatin mas Mesias? Jesus ta Salbador unikamente di e pueblo Hudiu?


E Konsiensia di Kristu

Hopi tempu pasá, den un kombersashon ku un persona, mi a skucha e remarke ku Jesus tabata simplemente unu ku a yega n’e asina yamá Christ-Consciousness (Konsiensia di Kristu). E persona aki tabata argumentá ku ta posibel pa otronan tambe yega na e supuesto Konsiensia di Kristu aki. Esaki ta un di e kerensianan sentral di e asina yamá New Age Movement. Den su buki titulá The Reappearance of the Christ and the Masters of Wisdom, Benjamin Creme a skirbi ku Herkules, Rama, Mitra, Krishna, i Buda tur tabatin e spiritu di e Kristu. Den Reflections of the Christ, David Spangler ta bisa ku Kristu ta un forsa. Defakto, Spangler ta argumentá ku Kristu ta e mesun forsa ku Lucifer, pero moviendo den direkshon kontrali.


Mi amigu e echo ta, ku no tin niun Christ-Consiousness, niun Konsiensia di Kristu; e palabranan ta reflehá algu ku no ta eksistente, un fantasia, un mentira. Ora Beibel ta papia di Kristu, e no ta referiendo na un sierto nivel di eksperensia òf konosementu spiritual, ni na un forsa impersonal. Ora Beibel ta papia di Kristu, e ta referí na un Persona, i un persona spesífiko. Beibel no ta papia di un Kristu; e ta papia di e Kristu, e Mesias.


Jesus di Nazarèt, E Úniko Mesias

Den Mateo 2:4 nos ta lesa ku rei Herodes “a yama tur e saserdotenan prinsipal i eskribanan di e pueblo huntu, i a kuminsá informá serka nan na unda e Cristo lo mester a nase.” Den Mateo 16:16, kontestando Jesus su pregunta enkuanto Su identidat, “Simon Pedro a kontestá i a bisa: "Abo ta e Cristo, Yu di e Dios bibu."” Su ei ho Christos; abo ta e Kristu. Lukas 4:41 ta bisa, “I tambe demoñonan tabata sali for di hopi hende, i nan tabata grita i bisa: ‘Abo ta e Yu di Dios!’ I E tabata reprendé nan i no tabata pèrmití nan papia, pasobra nan tabata sa ku E ta e Cristo.” No un Kristu, òf unu ku a yega na e asina yamá Konsiensia di Kristu.


Awor, nos tin di nota tambe ku tabatin vários kos ku lo mester a identifiká e Kristu, e Mesias: su desendensia, e tempu di su nasementu, e lugá di su nasementu, e karakter di su ministerio, e kontenido di su ministerio, su morto, resurekshon i asenshon.


Juan Boutista, ora e tabata den prizon, a manda bisa Jesus, “Ta Abo ta Esun ku mester bin, òf nos mester spera un otro?” Akinan Juan ta puntrando si Jesus ta e Mesias. Jesus a kontestá “Bai konta Juan loke boso ta tende i mira: e siegunan ta mira, e lamnan ta kana, e leprosonan ta wòrdu hasí limpi, i e sordonan ta tende, e mortonan ta wòrdu lantá i na e pobernan e evangelio ta wòrdu prediká” (Mateo 11:3-5). Lamnan ta kana, leprosonan ta wòrdu hasí limpi, surdunan ta tende, mortonan ta wòrdu lantá, i pobernan ta tende e evangelio; tur esakinan ta kosnan ku e Hudiu di e promé siglo tabata sabi mester a forma parti di e ministerio di e Mesias; i tur esakinan ta kosnan ku Jesus a kumpli kuné. Pues nos ta konkluí ku:


1. E palabra Kristu (Mesias) no ta referí na un konsepto apstrakto, ma na un Persona spesífiko, i ku

2. Jesus ta e Kristu.


Otro Salbadornan?

Pero tòg tin un pregunta ainda ku nos tin di trata. E no ta posibel ku ora Beibel ta papia di Kristu, e lo ta referiendo na e Salbador pa e Hudiunan spesifikamente? Ku otro palabra, e no por ta asina ku tanten Jesus tabata e kristu pa e Hudiunan, lidernan religioso manera Buda, Krishna, Confusio, i Mohamed tabata esnan pa e otro nashonnan i rasanan?


Wèl, esaki ta biblikamente imposibel; e no ta e siñansa bíbliko. Den Mat. 28:18-19 tin pará, “I Jesus a hala serka i a papia ku nan, bisando: ‘Tur outoridat a wòrdu duná na Mi den shelu i riba tera. Pesei, bai i hasi tur e nashonnan disipel di Mi, i batisá nan den nòmber di e Tata i di e Yu i di e Spiritu Santu.’” Nota ku Jesus su mandato na e Kristiannan Hudiu ta pa nan hasi tur e nashonnan disipel di djE. Pues Jesus a konsiderá su mes komo e Kristu, e Salbador pa e no-Hudiunan tambe.


Den Filipensenan 2:9-11, skirbiendo na kreyentenan no-Hudiu, i referiendo na Jesus, apòstel Pablo ta bisa, “Pesei tambe Dios a hals'E te na e halturanan, i a dun'E e nòmber ku ta riba tur nòmber, ku pa e nòmber di Jesus tur rudia mester dobla, di esnan ku ta den shelu, i riba tera, i bou di tera, i ku tur lenga mester konfesá ku Jesu‑Cristo ta Señor, pa e gloria di Dios Tata.” Ta masha kla for di e versíkulonan aki ku e siñansa bíbliko, ta ku Jesus ta Señor di henter kreashon, i Salbador di henter humanidat, no Hudiunan so. 1Timoteo 2:5 ta bisa, “Pasobra ta ún Dios so tin, i ún Mediador tambe entre Dios i hende, e hende Cristo Jesus.” Nota ku loke ta wòrdu bisá ta ku Jesus ta e úniko Mediador entre Dios i hende, esta e ser humano en general, no únikamente e Hudiunan.

40 views0 comments

Recent Posts

See All