Algun siman pasá na Iglesia E Bèrdat Ankrá nos a finalisá un seri di mensahe for di e buki di Jonas. Nos a lesa kon Señor ta menasá e siudat di Nínive ku destrukshon, ma tambe kon Señor ta demostrá grasia na nan ora nan a arepentí di nan maldatnan.
Dios, Kalamidat, i Hustisia
Tin hende tin problema ku e idea ku Dios ta manda kalamidat i destrukshon, sinembargo esaki ta un echo klaramente demostrá den historia i siñá den Skritura. Den Isaias 45:5, Señor ta bisa, “Ami ta SEÑOR i no tin ningun otro; fuera di Mi no tin Dios” (Ami ta Yahweh i no tin ningun otro; fuera di Mi no tin Elohim). E ta sigui asin’aki den v.7, “Esun ku ta forma klaridat i ta krea skuridat, Esun ku ta trese prosperidat i ta krea kalamidat; Ami ta e SEÑOR ku ta hasi tur e kosnan aki.” Den Lamentashonnan 3:38, nos ta lesa, “No ta for di boka di e Haltísimo tantu bon komo malu ta sali?” I den Amos 3:6 nos ta lesa, “Si tròmpèt wòrdu suplá den un stat, e hendenan no ta tembla? Si sosodé kalamidat den un stat, no ta SEÑOR a hasi esaki?”
Esaki ta nifiká ku Dios ta e outor di maldat? Nò! Den 1 Juan 1:5 nos ta lesa, “Dios ta lus i den djE no tin nada‑nada di skuridat” (Mira, Salmo 92:15; Santiago 1:13; 1 Korintionan 14:33). Dios ta hustu, i komo E ta hustu, E MESTER kastigá piká. Pues ora Señor trese òf permití kalamidat, manera Isa. 45:7, Lam. 3:38, i Amos 3:6 ta papia di dje, Dios no ta hasiendo maldat, ma ta aplikando hustisia.
Dios & COVID-19
Tin hende ta pensa ku si nos por splika e orígen di un kalamidat, si nos por komprendé kon e ta funshoná, i si nos sa kon pa trata ku esaki, anto e or’ei no tin ningun motibu pa atribuí tal kalamidat na un ser sobrenatural. Mi amigu, ta Dios a determiná e kalamidat su orígen i funshonamentu. I ta Dios, pa Su grasia, ta duna nos e konosementu i rekursonan pa trata kuné.
Ya promé ku COVID-19, nos tabata sa di e peligernan di un pandemia, pasobra nos a mira esaki den siglo 6, den siglo 14, i resientemente den siglo 20. Ecólogonan ta kalkulá ku tur aña ta surgi masoménos sinku enfermedat nobo, ku e frekuensia aki ta eskalando, i ku inevitablemente nan lo bira un pandemia. E kalkulashon ta ku tin 1.5 mion viro den e mundu animal ku nos no sa di dje. I kualke un dje vironan aki por wòrdu transmití na e ser humano.
Awor, kiko tur easki tin keber ku Dios? Kiko e Viro Corona, COVID-19 tin keber ku Dios? Tur kos! Pasobra Señor ta soberano. Esaki no ta nifiká ku Señor tin gusto den kalamidat; e ta nifiká si ku Señor ta na kòntròl di tur kalamidat.
Djis Orashon?
Ultimamente, den e krísis aktual ku nos ta bibando, ma tende mandatarionan bisa e pueblo pa hasi orashon. Mi ta aploudí e yamada aki. Pero mi ta konvensí ku loke Dios ta pidi di nos ta muchu mas ku simplemente orashon. Jeremias 18:7-10 ta bisa,
Si na un dado momento Mi deklará ku un nashon òf un reino mester wòrdu ranká afó, tumbá òf destruí, anto e nashon ei ku Mi a spièrta bira for di su maldat, lo Mi repentí di e kalamidat ku Mi a plania pa trese riba djé. Of si na un otro momento Mi deklará tokante di un nashon òf un reino, pa edifik'é òf pa plant'é, anto esaki hasi maldat den Mi bista dor di no obedesé Mi bos, e ora ei lo Mi repentí di e bondat ku Mi a primintí di bendishon'é kuné.
Loke Señor ta demandá di nos, ta pa nos bira for di nos maldat, pa obedensia na Su bos. E klave ta “obedensia,” no meramente orashon. Señor no ta interesá den bo orashon, si bo no ta kla pa someté na djE den obedensia. Pasobra bo por hasi orashon, i keda den adulterio. Bo por hasi orashon, i keda den fornikashon. Bo por hasi orashon, i keda den buracheria. Bo por hasi orashon, i keda ku envidia, kudisia, i mentira. Bo por hasi 1000 orashon, pero sin ningun intenshon di entregá bo bida na Kristu Hesus, den obedensia na Dios.
Den Mateo 5:13, Hesus ta bisa Su siguidonan, “Boso ta e salu di tera.” I den e siguiente versíkulo E ta bisa nan, “Boso ta e lus di mundu.” Rumannan den Kristu, esaki ta nifiká ku, den bista di Dios, nos tin e responsabilidat pa duna mundu e sabor di loke ta korekto, i preservé den loke ta bon. E ta nifiká tambe ku nos tin e responsabilidat pa lusá mundu, i mustra hende riba e bèrdat di e Palabra di Dios, i ku ta den Kristu so tin speransa.