Segun e doktrina Katóliko Romano di e Konsebimentu Imakulá di Maria, Maria a wòrdu konsebí sin piká original. Esaki ta bèrdat? Kiko Beibel ta bisa?
E Movementu Ekuméniko
Riba 29 Mart 1994 nan a publiká un dokumento titulá Evangelikonan i Katólikonan Huntu: E Mishon Kristian den e di Tres Milenio. E dokumento aki tabata kontené e firma di mas ku 30 persona; inkluyendo konosido Kristiannan manera, Bill Bright, Os Guinness, i J.I. Packer. E lista tabata kontené nòmbernan tambe di konosido Katólikonan manera, Obispu Carlos A. Sevilla, i e eskolar Katóliko Peter Kreeft. Pa dunabo un bista kiko e dokumento ta bisa i kiko a wòrdu firmá, at’akí un sitat,
“Tur ku aseptá Kristu komo Señor i Salbador ta rumannan den Kristu. Evangélikonan i Katólikonan ta rumannan den Kristu. Nos no a skohe otro, meskos ku nos no a skohe Kristu. E a skohe nos, i el a skohe nos pa ta di dje huntu (Juan 15). Ounke kon imperfekto nos komunion ku otro, nos ta rekonosé ku tin únikamente un iglesia di Kristu. Tin un iglesia pasobra tin un Kristu i e Iglesia ta su kurpa. Ounke kon difísil e kaminda, nos ta rekonosé ku nos ta yamá pa Dios pa yega na un realisashon mas kompletu di nos unidat den e kurpa di Kristu.”
E Doktrina Katóliko di e Konsebimentu Imakulá di Maria
E propósito di e estudio aki, i tambe den algun siguiente, ta pa mustra riba algun doktrina sentral di Iglesia Katóliko Romano ku ta kompletamente opuesto i kontradiktorio na e siñansanan fundamental di Skritura Santu, pa kua tambe tur Iglesia Kristian Bíbliko ta para pe.
Den e estudio aki nos lo kuminsá na trata e doktrina katóliko di e Konsebimentu Imakulá di Maria. Den estudionan ku lo sigui, nos lo trata siñansanan Katóliko tokante e Asumpshon di Maria, i Maria komo Ko-Redemptrix. Pues, laga nos kuminsá ku e Konsebimentu Imakulá. Iglesia Katóliko Romano ta siña ku e Vírgen Maria a wòrdu konsebí sin piká original. Den Romanonan 5:12-14 apòstel Pablo a skirbi lo siguiente,
“Pesei, meskos ku dor di ún hende piká a drenta den mundu, i morto dor di piká, i asina morto a pasa pa tur hende, pasobra tur a peka‑‑ pasobra promé ku Lei piká tabata den mundu; ma piká no ta wòrdu kontá ora no tin lei. Sinembargo, morto a reina for di Adam te na Moisés, asta riba esnan ku no a peka na mes manera di e transgreshon di Adam, kende ta un figura di Esun ku mester a bin.”
E pasahe aki ta siña ku den Adam tur ser humano a peka, komo ku Adam tabata e representante - e kabes – di e rasa humano. Pa motibu di su piká, henter su desendensia a nase tambe ku e disposishon natural pa peka. Esaki ta loke ta wòrdu yamá e doktrina di Piká Original. Ounke Iglesia Katóliko ta aseptá e doktrina aki, e ta mantené ku den kaso di e Vírgen Maria, e doktrina no ta aplikabel. Durante historia tabatin masha kontroversia enkuanto e siñansa aki den e Iglesia Katóliko. Ma riba 8 di desèmber 1854, despues di 700 aña di kontroversia, den e presensia di mas ku 200 dignatario eklesiástiko, e pontifise máksimo papa Pius IX a lesa e siguiente dekreto,
“Nos ta deklará, pronunsiá, i definí ku e doktrina ku ta mantené ku e Vírgen Maria, na promé instante ku el a wòrdu konsebí, dor di un privilegio i grasia singular di e Dios todopoderoso, pa medio di e méritonan di Hesukristu, e Salbador di humanidat, a wòrdu preservá imakulá for di tur mancha di piká original, a wòrdu rebelá dor di Dios, i pa e motibu ei mester wòrdu keré firmemente i konstantemente dor di e fielnan.”
Tres Problema ku e Doktrina di e Konsebimentu Imakulá di Maria
Pues, ku e palabranan aki e siñansa ku Maria tabata sin piká, a bira ofisial den Iglesia Katóliko. Sinembargo e siñansa aki ta topa ku varios problema. E tres problemanan di mas grandi ta esakinan:
1. E siñansa no ta haña niun respaldo for di Beibel.
2. E siñansa ta un kontradikshon direkto di e doktrina di piká original.
3. E siñansa ta kontradesí e testimonio ku Maria ta duna di su mes.
Den e di dos parti di e estudio aki lo mi trata kada un di esakinan na turno.