Feng Shui i Manipulashon di Energianan

Updated: Aug 2, 2019


Ta bèrdat ku nos por manipulá e movementu di un energia (chi) rondó di nos pa trese prosperidat i felisidat?


Kiko ta Feng Shui?

E gran teólogo Franses John Calvin a bisa,


“E mente di hende ta manera un mangasina di idolatria i superstishon; te asta asina tantu ku si un hende kere su propio mente, ta sigur ku e lo bandoná Dios i fabriká algun ídolonan den su propio selebre.”


E palabranan di John Calvin ta duna un apto ekspreshon di e konklushon ku mi ta yega na dje ora mi analisá e filosofia di Feng Shui. Feng ta nifiká bientu, i Shui ta nifiká awa. Feng Shui ta originá for di e filosofia Chines di Taoismo, i e ta deskribí un proseso kon pa manipulá i harmonisá e flow (koriente) di un supuesto energia universal den e hende su besindario físiko. Harper’s Encyclopedia of Mystical and Paranormal Experience ta duna e siguiente definishon,


“Feng Shui ta un ... arte Chines antiguo i kompleho ku ta kombiná mistisismo, siensia, i superstishon pa determiná salú, suerte, i prosperidat di akuerdo ku paisahenan natural i e ponementu di lugánan, edifisionan, i grafnan. ... Su konsepto fundamental ta ku pa por ta salú i prosperá, bo mester ta den harmonia ku e tera i risibí e benefisionan di ch’i.”


Promé ku nos sigui, ta importante pa mi splika kiko ta chi? Chi ta e energia ku supuestamente ta kore rondó di nos, i ku nos por manipulá pa trese benefisionan di entre otro salu, vitalidat, harmonia i kreatividat pa nos. Chi ta wòrdu yamá tambe, “rosea di e dragon,” i “bida i rosea di e universo.”


Awor, tin chi bon i tin chi malu. Chi ta bon ora e ta flui sosegá i pokopoko, i ora e lugá ku e ta okupá ta limpi, luminoso, i yen di bida. Esaki ta trese goso, suerte, i prosperidat. Chi ta malu ora e stagná òf ta move muchu lihé. Bo ta hañ'é den lugánan skur, sushi, i kaminda tin morto. Esaki ta trese mala suerte i problemanan finansiero. Segun proponentenan di Feng Shui nos por manipulá e movementu di chi di tal manera pa e traha na nos fabor.


Un Análisis Bíbliko di Feng Shui

Laga nos para ketu akinan un ratu. Pues segun Feng Shui, loke ta determiná nos kalidat di bida, si mi por yam'é asina, ta e movementu di chi i nos abilidat pa kontrolá e movementu aki. Pero lesa loke apòstel Pablo, guiá pa e Spiritu di Dios, ta bisa den Galationan 6:7-8,


“No gaña boso mes: Dios no ta laga hasi bofon di djE; pasobra loke un hende sembra, esaki tambe e lo kosechá. Pasobra esun ku sembra pa su mes karni lo kosechá korupshon for di e karni, ma esun ku sembra pa e Spiritu lo kosechá bida etèrno for di e Spiritu.”


E sabio Salomon den Prov. 22:8 tambe a bisa: “Esun ku sembra inikidat lo kosechá banidat.” I den Oseas 10:12 nos ta haña e otro’un banda di e mesun medaya: “Sembra den hustisia, kosechá den miserikòrdia; prepará bo tera ku no ta kultivá, pasobra ta tempu pa buska SEÑOR, te ora ku E bin i yobe hustisia riba boso.”


Pues ta sumamente kla for di e pasahenan aki, ku loke realmente ta determiná nos kalidat di bida ta nos grado di obedensia na Dios i e boluntat di Dios. Esaki ta kontrario na loke Feng Shui ta siña.Tanten ku Kristianismo ta siña ku hende mester risibí salbashon den Kristu Hesus, i adoptá un bida di obedensia na Dios, Feng Shui ta siña ku Dios no ta nesesario. De fakto, e ta siña ku hende mes por; tur loke e tin mester ta e konosementu i abilidat pa manipulá un energia.


Esaki por ta zona masha atraktivo pa algun, pero e echo ta ku e no ta bèrdat. Nos no por remplasá obedensia na Dios, pa manipulashon di supuesto energianan. Nos no por trapa i neglishá e mandamentunan di Dios, i krea pa nos mes un bida a color de rosas. E no ta bai, e no ta funshoná!


Awor, laga nos bisa, nos no ta neglishá obedensia na Dios, ma tòg praktiká Feng Shui. Tin un problema ku esaki? Wèl, na promé lugá, si e Palabra di Dios ta bisa bon kla ku ta Dios i nos obedensia na djE ta lokual ta determiná nos kalidat di bida, Feng Shui ta bira inesesario. Na di dos lugá, bo bida no por ta karakterisá pa obedensia na Dios, i na mes momentu mantené un filosofia ku, sigur den práktika, ta mantené ku Dios ta inesesario. Na di tres lugá, tin sierto elementonan den Feng Shui ku ta wòrdu kategorikamente prohibí dor di Dios. Elementonan manera: Spiritismo, astrologia, i numerologia (mira Deut. 18:10-12).


Konklushon

Feng Shui ta un práktika okulto. E pensamentu ku nos por manipulá e supuesto energia di chi pa trese felisidadt i prosperidat den nos bida ta kontradesí loke Skritura Santu ta siña. Berdadero goso, felisidat, i prosperidat nos ta haña solamente den e boluntat di Dios i nos obedensia na djE.


10 views0 comments

Recent Posts

See All