Dios tabata Demasiado Severo ku Ananias i Safira?

Updated: Aug 3, 2019


Dios tabata demasiado severo ku Ananias i Safira ora, di un manera abrupto, El a kita esakinan su bida? Nan mentira tabata meresé tal kastigu?


Loke ku a Pasa

Pa hopi hende, un di e storianan mas inkonfortabel den e buki di Echonan ta loke ta wòrdu relatá den 5:1-11 tokante Ananias i Safira. E pasahe en kuestion ta bisa asin’aki,


“Ma un hòmber ku yama Ananias, huntu ku su esposa Safira, a bende un pida propiedat, i ku tur konsentimentu di su esposa el a tene algu atras di e plaka pa su mes, i a trese un parti di e plaka i a pone esaki na pia di e apòstelnan. Ma Pedro a bisa: ‘Ananias, pakiko Satanás a yena bo kurason pa gaña Spiritu Santu, i pa tene algu atras di e plaka di e tereno? Si el a keda sin wòrdu bendí, lo e no a keda di bo? I despues di a wòrdu bendí, e plaka no tabata den bo poder? Pakiko bo a pone e kos aki den bo kurason? No ta hende bo a gaña, sino Dios.’ I ora ku el a tende e palabranan aki, Ananias a kai abou i a hala su último rosea; i gran temor a bin riba tur esnan ku a tende di esaki. I e hobennan a lanta para i a tap'é, i despues di a hib'é pafó, nan a der'é. I komo tres ora despues su esposa a drenta sin sa kiko a sosodé. I Pedro a puntr'é: ‘Bisami si boso a bende e tereno pa asina tantu?’ I el a kontestá: ‘Sí, pa asina tantu.’ I Pedro a bis'é: ‘Pakiko boso a kumbiní ku otro pa pone Spiritu di Señor na prueba? At'e pianan di esnan ku a dera bo esposo ta na porta, i nan lo karga abo tambe hiba pafó.’ I mesora el a kai abou na Pedro su pianan i a hala su último rosea; i e hobennan a drenta i a hañ'é morto, i nan a kargu'é hiba pafó i a der'é banda di su esposo. I gran temor a bin riba henter e iglesia i riba tur esnan ku a tende e kosnan aki.”


Preguntanan Ferfelu & Reinterpretashon

E storia aki ta lanta algun pregunta tòg basta ferfelu. Ta kiko Ananias i Safira a hasi ku tabata asina malu? Kiko por tabata asina teribel pa a kousa nan morto, i morto inmediato? Dikon Pedro no a simplemente eksponé nan piká i despues yama nan na arepentimentu?


Den su buki titulá The Message of Acts, e eskolar John R.W. Stott ta remarká ku “hopi lesadó di e storia’ki ta sinti nan mes ofendí dor di loke nan ta konsiderá komo e severidat di Dios su huisio.” Un tal W.L. Knox a bisa ku e ta “spera ku Ananias i Safira ta legendario;” esta, personahenan den un storia ku probablemente no tin niun base históriko. Otro komentaristanan ta atribuí e morto di e pareha, no na Dios, ma na Pedro, kende, segun nan, sea a pone un maldishon riba e pareha òf a pone nan bou di un preshon sikológiko ku a kondusí na nan morto. Ma e teksto bíbliko klaramente ta duna nos di komprendé ku aki ta trata di un huisio divino, esta, un huisio ku a bini di Dios.


Pues bon. Kiko anto tabata e kousa di e huisio aki? E kousa no tabata djis e echo ku e pareha a tene algu atras di e plaka di e tereno. E kousa di e huisio tabata e echo ku nan a tene algu atras di e plaka di e tereno, tanten nan tabata pretendé ku esei no tabata e kaso. Den v.3 Pedro ta bisa Ananias ku Satanás a yena su kurason pa gaña Spiritu Santu. I den v.9 e ta bisa Safira: “Pakiko boso a kumbiní ku otro pa pone Spiritu di Señor na prueba?” Pues e pareha a disidí pa wak si nan tabata por a gaña e Spiritu Santu i keda sin sufri kastigu; nan a bai tèst wak si nan tabata por a dobla e Spiritu Santu i hink’é den nan saku. E gran teólogo John Calvin, den su komentario riba e buki di Echonan, a bisa asin’aki: “Lukas ta kondená Ananias pa solamente un krímen, su deseo pa gaña Dios i e Iglesia ku un ofrenda falsu.”


Motibu pa e Severidat di Dios Su Huisio

Awor dikon Señor su huisio tabata asina severo, ku e pareha mester a muri mesora? Probablemente tin dos motibu pa esaki. Na promé lugá, esaki tabata e promé bia ku Kristiannan (komo iglesia) a pone Dios na prueba; wak si Su santidat realmente ta demandá pa Su pueblo tambe ta santu; wak si e Dios di grasia tambe ta e Dios ku ta kastigá piká. Pues e tabata importante pa, for di inisio, Dios mustra klaramente ku E ta santu, i ku E ta tuma e santidat di Su iglesia na serio.


E di dos motibu pakiko mi ta kere Señor tabata asina severo, ta pasobra Ananias i Safira tabata biba den un lugá i tempu kaminda e presensia di Dios i e manifestashon di e gloria di Dios tabata asina intenso i poderoso. Awor, kaminda e evidensia i manifestashon di Dios su presensia ta mas grandi, e piká di kuestioná e santidat di Dios ta muchu mas serio.


Konklushon

Ora nos tuma nota di e luga i tempu den kua Ananias i Safira tabata biba, ora nos tene na kuenta ku e pareha aki “a kumbiní ku otro pa pone Spiritu di Señor na prueba,” i ora nos konsiderá e echo ku nan a risibí serka apòstel Pedro tur oportunidat pa papia e bèrdat ma a nenga di hasi esaki, nos tin di konkluí ku Señor tabata kompletamente hustu den Su huisio. Dan Stevers tin un bon animation di e storia aki. Pa wak esaki, klik riba animation.

7 views0 comments