E Promesanan di Salmo 91



Salmo 91: Teksto & Introdukshon

Den e tempu di krísis mundial aki hopi ta buska konsuelo i siguransa den Dios i Su Palabra. Un di e tekstonan masha gustá ta Salmo 91. Nos por parti e salmo aki den tres sekshon: vv. 1-8, vv. 9-13, i vv. 14-16. Laga nos lesa e promé sekshon; versíkulonan 1-8. E ta bisa asin’aki,

1 Esun ku ta biba bou di e protekshon di e Haltísimo lo permanesé den e sombra di e Todopoderoso. 2 Lo mi bisa SEÑOR: "Mi refugio i mi fòrti, mi Dios, den Kende mi ta konfia!" 3 Pasobra E ta Esun ku ta librabo for di e trampa di e yagdó, i for di e pèst ku ta destruí. 4 E lo kubribo ku Su plumanan, i bou di Su halanan lo bo buska refugio; Su fieldat ta un eskudo i un baluarte. 5 Lo bo no tin miedu di e teror di anochi, ni di e flecha ku ta bula den dia, 6 ni di e pèst ku ta kana den skuridat, ni di e destrukshon ku ta destruí na ora di mèrdia. 7 Mil por kai band'i bo, i dies mil na bo man drechi, ma serka bo e lo no yega. 8 Solamente ku bo wowo lo bo opservá, i mira e rekompensa di e malbadonan.

E salmo aki ta papia di e protekshon di Dios pa esnan ku ta buska refugio serka djE. E outor ta usa varios imagen pa ekspresá e protekshon aki di Dios. E ta papia di refugio i forti. E ta papia di plumannan i halanan ku ta kubri. E ta papia di eskudo i baluarte.

Promesa di Kompletu i Perfekto Protekshon?

Ora nos lesa e salmo aki den isolashon, e ta parse di ta duna promesanan di perfekto i kompletu protekshon na e kreyente. Protekshon for di trampa, protekshon for di pèst, protekshon for di teror, protekshon for di destrukshon, protekshon for di guera. Pero nos sa di e miles i miles di kreyentenan fiel durante historia ku a sufri i a pèrdè nan bida, i nos ta tende tambe di e miles di kreyentenan ku awe ainda ta sufri persekushon i morto. Es mas, nos sabi di e palabranan di Hesus na Su siguidonan den Juan 16:33, “Den mundu boso tin tribulashon.” E palabra tradusí “tribulashon,” ta e tèrmino Griego thlipsis, kua por a wòrdu tradusí tambe: Problema, sufrimentu, persekushon, opreshon, i aflikshon.

Eksperensia di Angustia

Pues, mirando e realidat di historia, eksperensia, i e propio palabranan di Hesus, kon nos tin di tuma e promesanan den Salmo 91? Nos tin di tuma nota di algun kos den e Salmo aki. Na promé lugá, tende kiko e di tres sekshon di e salmo ta bisa, esta vv. 14-16,

14 "Pasobra el a stimaMi, pesei lo Mi libr'é; lo Mi proteh'é, pasobra e konosé Mi nòmber. 15 E lo sklama na Mi, i Ami lo kontest'é; lo Mi ta kuné den angustia; lo Mi reskat'é i onr'é. 16 Ku bida largu lo Mi satisfas'é, i lagu'é mira Mi salbashon."

Den e sekshon aki nos ta haña Señor Dios mes papiando. I tende atrobe kiko E ta bisa den v.15, “Lo Mi ta kuné den angustia.” Pues, Señor ta bisando ku e kreyente, e hustu, lo eksperensiá angustia. Pero ku E lo ta huntu kuné.

Kalamidatnan Spesífiko

Un otro kos ku mi ke pa nos nota. Versíkulo 8 ta bisa, “Solamente ku bo wowo lo bo opservá, i mira e rekompensa di e malbadonan.” Esaki lo por ta indiká ku e salmo aki ta papia no di desasternan general, ma di spesifikamente e desasternan ei ku Señor ta manda pa kastigá e malbadonan. Siendo esaki e kaso, nos tin di komprendé e orei ku Salmo 91 no ta un promesa ku e kreyente lo no eksperensiá niun klase di kalamidat. Mas bien, e ta un promesa ku e kreyente lo no eksperensiá e kalamidatnan ei ku Señor manda komo huisio riba e malbado.

Motibu pa Kurashi i Speransa

Ok. Ban bèk ku mi na e palabranan di Hesus den Juan 16:33. Hesus ta bisa, “E kosnan aki Mi a papia ku boso, pa den Mi boso por tin pas. Den mundu boso tin tribulashon, ma tene kurashi, Mi a vense mundu." Pues mi ruman den Kristu, ounke nos lo eksperensiá tribulashon riba e mundu aki, nos mester tene kurashi pasobra nos Señor a vense mundu. No tin nada ku ta pafó di Su kontrol, i nada no ta skapa Su bista. En medio di e krísis aktual nos mester tin kurashi, i nos por tin kurashi, pasobra nos Señor ta bibu, i den dje nos tin speransa. Nos ta keda hasi orashon, i nos ta keda konfia. Pero, no importá kiko bini; den djE nos tin speransa.

62 views0 comments

Recent Posts

See All