E tabata robes pa Dios bisa Abraham pa e sakrifiká su yu Isaak? Esaki no ta un kontradikshon di loke Skritura mes ta prohibí?
E Demanda
Den Génesis 22:1-2 nos ta lesa asin’aki,
“Awor a sosodé ku despues di e kosnan aki Dios a pone Abraham na prueba i a bis'é: ‘Abraham!’ I el a bisa: ‘At'ami aki.’ I El a bisa: ‘Tuma bo yu hòmber awor, bo úniko yu, kende bo ta stima, Isaak, i bai na e tera di Moria, i ofres'é aya komo un ofrenda kimá riba un di e serunan ku lo Mi bisabo di djé.’”
E ta difísil pa komprendé, muchu ménos ekspresá den palabranan, e horor ku Abraham lo mester a sinti. Matthew Henry ta komentá riba e pasahe en kuestion, i ta skirbi lo siguiente,
“Den poko palabra, loke Dios a bisé ta, Abraham, bai mata bo yu; i e mandato aki ta wòrdu duná na dje na un manera asina severo kua ta hasi e prueba ainda mas doloroso. Ora Dios ta papia, Abraham, sin duda, ta tuma nota di kada palabra, i ta skucha atentamente; i kada palabra akinan ta un spada den su wesunan: e prueba ta reforsá ku frasenan yen di aflikshon.”
E Problema
Ma tòg pa nos ne momentu aki, no ta e sintimentunan ku a originá for di e prueba ta di mayor importansia; loke ta partikularmente problemátiko akinan, ta e karakter mes di e prueba. Mi ta splika. Den Levítiko 18:21 Dios ta bisa e pueblo di Israel bon kla: “No duna ningun hende di bo desendensia pa wòrdu ofresí na Molok; no profaná e nòmber di bo Dios; Ami ta SEÑOR.” I den 20:2 Señor ta bisa: “Kualke hòmber for di e yunan di Israel òf for di e stranheronan ku ta keda biba pa un tempu na Israel ku duna un di su yunan na Molok, mester wòrdu matá sigur; e pueblo di e tera mester piedr'é ku piedra.”
Pues, si den e pasahenan aki Dios ta prohibí sakrifisio humano, dikon den Génesis 22 nos ta haña ku E ta manda Abraham pa sakrifiká su yu? At’akí algun kos ku nos tin di nota.
Análisis & Solushon
Na promé lugá, nunka e no tabata Señor su plan pa Abraham sakrifiká su yu. Den Gen. 22:11-12 nos ta lesa, “Ma e Angel di SEÑOR a yama bis'é for di shelu: ‘Abraham, Abraham!’ I el a bisa: ‘At'ami aki.’ I El a bisa: ‘No pone man riba e mucha i no hasié nada, pasobra awor Mi sa ku bo ta teme Dios, komo ku bo no a nengaMi bo yu, bo úniko yu.’” E versíkulonan aki ta mustra ku e úniko intenshon di Dios tabata pa revelá Abraham su temor pa Dios.
Na di dos lugá, den Lev.18:21; 20:2 e prohibishon tabata spesífikamente kontra sakrifisio humano ofresí na Molok, kua tabata un dios falsu; un dios pagano. Pues, ku Señor ta bisa Abraham pa ofresé Isaak na djE, no ta un kontradikshon di e pasahenan aki; pasobra Señor no ta Molok. Señor Dios, Yahweh Elohim, ta e úniko Dios berdadero; i E so tin e derecho di bisa ki ora un bida tin di wòrdu kitá, i kon e tin di wòrdu kitá.
Na di tres lugá, for di Skritura nos ta komprendé ku Abraham tabata kere di kurason ku Señor lo a lanta Isaak bèk for di morto. Den Hebreonan 11:17-19 tin pará,
“Pa medio di fe Abraham, ora ku el a wòrdu poní na prueba, a ofresé Isaak; i esun ku a risibí e promesanan tabata ofresiendo su yu unigénito; ta na djé a wòrdu bisá: ‘Ta dor di Isaak bo desendientenan lo wòrdu kontá.’ El a konsiderá ku Dios ta poderoso pa lanta hende asta for di morto.”
Gen. 22:5 mes ta mustra riba e fe aki ku Abraham tabatin, ora el a bisa su sirbidónan: “Keda aki ku e buriku, i ami ku e mucha lo bai ayanan; i nos lo adorá i bolbe serka boso” (énfasis di mi).
Finalmente, mi tin di enfatisá ku e no tabata algu moralmente robes pa Dios ordená Abraham pa sakrifiká su yu. Un artíkulo den The New Interpreter’s Study Bible titulá E Dilema Moral di e Sakrifisio di Isaak ta komentá riba e suseso aki i ta bisa: “Tanten e obedensia di Abraham lo por wòrdu komprendé i apresiá for di un perspektiva históriko, e práktika di sakrifisio humano mester wòrdu rekonosé, manera ta e kaso den mayoria teksto bíbliko, komo un kontradikshon di berdadero adorashon i moralidat.”
Mi amigu, no tin niun dilema moral ku e sakrifisio di Isaak, pasobra e òrdu a bini di e úniko Dios berdadero i soberano riba bida i morto; Esun ku ta duna bida i ta eksihí esaki bèk ora E ke, i manera E ke (ref. Deut. 32:39; Job 1:21). I nos no tin di lubidá ku e Dios aki mes a ofresé Su Yu unigénito riba e krus di kalvario “pa ken ku kere den djE no bai pèrdí, ma tin bida etèrno” (Juan 3:16).
Konklushon
Ora nos analisá i interpretá korektamente e tekstonan bíbliko relashoná ku e òrdu pa sakrifiká Isaak (Génesis 22:1-2; 11-12), e prohibishon di sakrifisio humano (Levitiko 18:21; 20:2), e espektativa di Abraham (Hebreonan 11:17-19), e outoridat di Dios pa duna i kita bida (Deut. 32:39; Job 1:21), i e sakrifisio di Kristu mes (Juan 3:16), nos ta yega na e konklushon ku no tabatin nada moralmente malu ku Dios Su òrdu na Abraham pa e sakrifika su yu Isaak.