Un Hòmber di 969 Aña?

Updated: Aug 2, 2019


Den Génesis 5 nos ta haña menshon di hòmbernan ku a biba riba 900 aña. Nos tin di tuma esakinan komo añanan literal?


Den e genealogia di Génesis 5, e edat promedio di esnan ku a biba nan bida nòrmal, tabata riba 900 aña. Versíkulo 5 ta bisa ku Adam a biba 930 aña; i den v.27 nos ta lesa ku Matusalen a biba 969 aña. Ma den Salmo 90:10 tin pará ku e dianan di nos bida ta solamente 70 òf 80 aña, kua ta kuadra mas mihó ku nos eksperenshanan aktual. Esaki no ta mustra ku nos no por tuma e edatnan den Génesis 5 literalmente? Wèl, na promé lugá Salmo 90 ta referí na e tempu di Moises i tempunan despues.


Un Sistema di Konta Lunanan?

Algun hende a sugerí ku e palabra “añanan” den Génesis 5 tabata representá un sistema di konta lunanan. Segun e interpretashon aki e “añanan” en kuestion mester wòrdu dividí den 10 òf 12. Aplikando e sistema aki na e edat di Adam, su edat ta wòrdu redusí na 93 òf 77 aña, kua ta muchu mas manehábel.

Ma, tin dos problema ku e teoria aki. Promé, e idioma Hebreo di Tèstamènt Bieu no ta hustifiká e interpretashon di “añanan” komo “lunanan.” Na di dos lugá, den Génesis 5:12 tin pará ku “Kainán tabatin 70 aña” ora el a engendrá Mahalaleel. I den v.15 nos ta lesa ku “Mahalaleel tabatin 65 aña” ora el a engendrá Jared. E interpretashon di “lunanan” na lugá di “añanan” akinan, lo ta nifiká ku Kainán i Mahalaleel lo tabatin ménos ku 6 aña ora nan a engendrá nan yunan.


Nòmbernan ta Representá Tribunan?

Un otro manera ku algun a trata na splika e edatnan haltu den Génesis 5 ta dor di interpretá e nòmbernan komo tribunan. E teoria aki tambe tin su problemanan kuné. Promé, algun dje nòmbernan menshoná den e genealogia (e.g. Adam, Sèt, Enok, i Noe) ta referí klaramente na individuonan kende nan bida ta wòrdu nará den Génesis 1-9. Na di dos lugá, tribunan no ta muri, manera ta wòrdu bisá di e individuonan aki. Na di tres lugá, e referensha na engendrá “yu hòmber i yu muhé” no ta kuadra ku e teoria aki.


Konklushon

Konsekuentemente, e ta mas mihó pa interpretá e edatnan haltu den Génesis 5 literalmente.


Pregunta

Kiko bo ta nota di e edatnan ora bo kompará e genealogia den Génesis 5 ku esun den Génesis 11?

7 views0 comments

Recent Posts

See All