Ta bèrdat ku den Génesis 1:28 Dios ta bisa nos pa abusá di e naturalesa pa nos propio benefisionan?
E Akusashon
Den Genesis 1:28 nos ta lesa lo siguiente,
“Anto Dios a bendishoná nan, i Dios a bisa nan: ‘Sea fruktífero i multipliká, i yena e tera i hasi esaki someté na bo; i goberná riba e piskánan di laman i riba e parhanan di shelu, i riba tur ser bibu ku ta move riba tera.’”
Pa hopi, un bunita versíkulo ku ta papia di Dios Su bendishon riba e rasa humano, i nos responsabilidat pa ku e resto di kreashon. Pero pa algun otro e versíkulo aki ta wòrdu mirá komo un di e kousanan pa nos problemanan ekológiko; e hustifikashon pa malusá nos rekursonan natural, i abusá di nos medioambiente.
Den su konosido artíkulo, The Historical Roots of Our Ecological Crisis, publiká algun dékadanan pasa, Lynn White Jr. ta bisa ku e desbalanse ekológiko ta e resultado di arogansia Kristian kontra naturalesa. Segun White, Beibel ta siña ku “e tabata Dios su boluntat pa hende abusá di naturalesa pa e hende su propio benefisionan.”
E Refutashon & Perspektiva Bíbliko
E akusashon ku White ta presentá akinan kontra Kristianismo i e Palabra di Dios ta totalmente falsu. Nota e siguiente puntonan:
Na promé lugá, den Gen.1, kua ta duna nos e relato di Kreashon, Dios mes ta deklará ku loke El a krea tabata bon. Na final di e di seis dia, den v.31 Skritura ta bisa nos asin’aki: “I Dios a mira tur loke El a traha, i ata, tur kos tabata masha bon.” Pues, pa argumentá ku den v.28 Dios ta duna e ser humano pèrmit pa abusá di e naturalesa ta algu klaramente apsurdo i kontrali na e konteksto.
Na di dos lugá, segun Salmo 24:1, “Tera ta di SEÑOR, i tur loke ku e ta kontené, mundu, i esnan ku ta biba den djé.” I den Salmo 50:10-12, Señor ta deklará: “Tur bestia di mondi ta di Mi, e bakanan riba mil seru. Mi konosé tur parha di e serunan; i tur loke ta move den kunuku ta di Mi. Si Mi tabatin hamber, lo Mi no a bisabo; pasobra mundu ta di Mi, i tur loke ku e ta kontené.” Si nos tuma e pasahenan aki tambe na konsiderashon, nos tin di konkluí ku e ser humano ta kai bou di Dios komo simplemente kuidadonan di e kreashon. Bou di niun kondishon nos no ta liber pa abusá di nos medioambiente i malusá nos rekursonan natural.
Na di tres lugá, den Gen. 2:15 nos ta lesa ku Dios a pone “e hòmber” den e hòfi pa “kultiv'é i kuid'é.” Esaki ta nos responsabilidat pa ku e naturalesa. Rom.8 ta duna un splikashon interesante di e estado aktual di e naturalesa; un estado ku a surgi komo resultado di e kaida di hende, i e maldishon ku a wòrdu pronunsiá kontra e naturalesa. Laga nos nota algun versíkulo:
- V.20 ta bisa ku “e kreashon a wòrdu sometí na banidat.”
- V.21 ta siña ku e kreashon ta sklabisá na korupshon.
- V.22 ta bisa ku “henter e kreashon ta keha i ta sufri e dolónan di parto huntu.”
Awor, den v.19 apòstel Pablo a skirbi ku “e kreashon ta spera ku gran antisipashon riba e revelashon di e yunan di Dios.” E frase “revelashon di e yunan di Dios” ta referí na e momentu di “nos adopshon komo yu,” e momentu di “redenshon di nos kurpa,” e momentu den kua nos lo mira Dios manera E ta i ta manera E ta. E kreashon, e naturalesa, ta “spera ku gran antisipashon” riba e suseso ei. E palabra “antisipashon” ta e tradukshon di e Gr. Apokaradokía, kua literalmente ta nifiká “rèk kabes afó.” E naturalesa ta ansioso pa mira “e revelashon di e yunan di Dios;” pasobra tal akto lo nifiká e liberashon di e naturalesa mes for di banidat i korupshon.
Konklushon
Pues nos tin di komprendé ku for di momentu di e hende su kaida den e hòfi di Eden, naturalesa no ta den e estado perfekto mas ku Dios tabata ke pa e ta. Ma esaki naturalmente no ta nifiká ku awor nos tin pèrmit pa abusá di dje. No tin nada den Beibel ku ta siña òf motivá tal akshon, ni tampoko Gen.1:28.