Kondená Na un Bida Infelis i Sin Goso?

Updated: Aug 2, 2019


Ta bèrdat ku religion, spesifikamente Kristianismo, ta mata? Ta bèrdat ku fe den Dios i obedensia na Kristu ta mata e kreyente su goso i felisidat?


E Eror di Hitchens

Den su buki God is not Great e konosido eskritor ateista Christopher Hitchens tin un kapítulo titulá Religion Kills. Akinan e lansa algun krítika kontra religion, partikularmente Kristianismo. Ta bon pa nos konsiderá i kontestá e krítikanan aki. Despues di a sita John Stuart Mill i Lucretius na komienso di e kapítulo, Hitchens ta skirbi asin'aki,


“Imaginá bo ku bo por hasi algu ku ami no por. Imaginá bo, den otro palabra, ku bo por pone bo dilanti e imágen di un kreador infinitamente bon i todopoderoso, kende a forma un idea di bo, despues traha bo i forma bo, trese bo den e mundu ku el a traha pa bo, i awor ta supervisá i perkurá pa bo asta ora bo ta drumi. Imaginá bo, mas aleu, ku si bo obedesé e reglanan i mandamentunan ku e amorosamente a preskribí, lo bo kualifiká pa un eternidat di felisidat i sosiegu. ... Dikon e kerensia aki no ta hasi esnan ku ta kere den dje felis?”


Akinan Hitchens ta hasi un pregunta sin kuestioná promé e presuposishon riba kua su pregunta ta basá; esta e presuposishon ku esnan ku ta kere e kosnan ariba-menshoná no ta felis. Promé ku Hitchens a pensa mes di hasi tal pregunta, e mester a establesé komo fakto ku e personanan aki, e kreyentenan, enbèrdat no ta felis. Ma esaki ta lokual e no ta hasi; e ta simplemente asumí ku nan ta infelis.


Evidensia for di Eksperensia i Skritura

E presuposishon aki ta un kontradikshon tantu di eksperensia komo di Skritura. Di eksperensia, pasobra míles i míles di kreyente ta en realidat felis. I e presuposishon ta un kontradikshon di Skritura pasobra den Juan 10:10 Hesus ta bisa, “E ladron ta bin solamente pa hòrta, pa mata i pa destruí; Ami a bin pa nan tin bida i pa nan tin é na abundansia.” E frase “pa nan tin é na abundansia” ta e tradukshon di e Griego perisson echōsin, kua ta papia di kantidatnan èkstra i kontinuo. Augustinus (354 – 430 AD), kende tabata un di e teólogonan di mas grandi i influyente, dirigiendo su mes na Dios, a bisa,


“Tin un goso ku no ta wòrdu duná na e inkrédulonan, pero na esnan ku stima Bo pa ken Bo ta, kende nan goso Abo mes ta. I esaki ta e bida felis, pa regosihá na Abo, di Abo, pa Abo; esaki e ta, i no tin niun otro” (Confessiones).


Promé ku el a kometé suisidio, e konosido artista Ralph Barton a laga e siguiente nota riba su kusinchi,


“Mi tabatin poko difikultat, hopi amigu, gran logronan; mi a pasa di kasá pa kasá, i di kas pa kas, ma bishitá paisnan grandi di mundu, pero mi ta fadá di inventá kosnan pa yena 24 ora di dia.”


Den su famoso obra Tragedy of MacBeth William Shakespeare a duna e siguiente komentario riba bida, “E ta un kuenta kontá pa un idiot, yen di zonido i intensidat ku no ta nifiká nada.”


Ki gran kontraste esaki ta ku kon e Kristiannan na Masedonia a eksperensiá nan bida. Den 2 Korintionan 8:1-2 apòstel Pablo ta skirbi asin’aki,


“Awor, rumannan, nos kier laga boso sa di e grasia di Dios ku a wòrdu duná den e iglesianan di Masedonia, ku den hopi prueba di aflikshon nan abundansia di goso i nan pobresa grandi a rebosá den e rikesa di nan generosidat.”


Nota e realidat den bida di e Kristiannan aki. Den hopi prueba i gran pobresa te ainda nan tabatin un “abundansia di goso.” Pa e inkrédulo tal eksperensia ta un kontradikshon, un imposibilidat, un fantasia. Ma pa e Kristian ku tin fe den Señor esaki ta e realidat. Hesus a bisa, “Pas Mi ta laga pa boso; Mi pas Mi ta duna boso; no manera mundu ta duna, Mi ta duna boso. No laga boso kurason bira intrankil, ni lagu'é tene miedu” (Juan 14:27). Konsiderá e eksperensia di Pablo i Silas den Echonan 16. Lukas ta skirbi,


“I a sosodé ku ora nos tabata bai na e lugá di hasi orashon a bin topa nos un mucha muhé esklabu ku tabatin un spiritu di adivinashon, kende tabata duna su shonnan hopi ganashi ku miramentu di destino. E tabata sigui Pablo i nos, i tabata grita, bisando: ‘E hòmbernan aki ta sirbidónan di e Dios Haltísimo, kendenan ta proklamá na boso e kaminda di salbashon.’ I el a sigui hasi esaki hopi dia largu. Ma Pablo, fadá di esei, a bira bisa e spiritu: ‘Mi ta ordenábo den e nòmber di Jesu‑Cristo pa sali for di djé!’ I mesora el a sali. Ma ora su shonnan a mira ku nan speransa di ganashi a kaba, nan a gara Pablo i Silas i a lastra nan hiba na e plasa dilanti di e outoridatnan, i ora nan a hiba nan serka e magistradonan, nan a bisa: ‘E hòmbernan aki, siendo hudiu, ta pone nos stat arib'abou, i ta proklamá kustumbernan ku lei no ta pèrmití nos aseptá ni warda, siendo romano.’ I e multitut a lanta tur huntu kontra nan, i e magistradonan a sker Pablo i Silas nan paña kita for di nan kurpa i a duna òrdu pa suta nan ku bara. I despues di a duna nan hopi gòlpi, nan a tira nan den prizon i a duna e wardadó di prizon òrdu pa warda nan bon wardá; i esaki, despues di a risibí un òrdu asina, a tira nan den e prizon di mas paden i a sera nan pia na sepa” (vv.16-24).


Esaki tabata vv.16-24. Nota kiko Lukas ta skirbi awor den v.25, “Ma banda di mei anochi Pablo i Silas tabata hasi orashon i tabata kanta himno di alabansa na Dios.” Akinan nos ta mira un gran demostrashon di e goso ku e Kristian por tin; un goso ku no ta dependé di sirkunstansianan eksterno, ma ku ta biba den e kurason interno di e kreyente, i ta wòrdu manifestá den akshonnan eksterno.


E Opium di e Pueblo?

E filósofo i ekonomista Aleman Karl Marx a bisa, “Die Religion ... ist das Opium des Volkes“ esta, “Religion ta e opium di e pueblo” (Zur Kritik der Hegelschen Rechtsphilosophie). Esaki te ainda ta e pensamentu di hopi hende. Kristiannan ta wòrdu mirá komo hendenan suak, hendenan ku tin mester di algu pa yuda nan enfrentá e problemanan di bida. Mi amigu, e realidat ta ku ta nos tur tin mester di algu pa yuda nos enfrentá i pasa riba e difikultatnan den bida. Awor, tin hende ta buska e sosten ei, e yudansa ei, den alkohòl, sèks, droga, rikesa, òf popularidat. Ma e diferensia ta ku Kristianismo no solamente ta ankrá den realidat, ma ku tambe e ta funshoná.


E echo di ta parti di e famia di Dios, e echo di tin salbashon eterno, e echo di ta ko-eredero ku Kristu, e echo di tin e Spiritu di Dios bibando den nos, e echo di tin un speransa glorioso, tur ta hiba na un goso inimaginabel i inalkansabel pa esun sin Kristu. Awor, esaki ta nifiká ku ta tur Kristian ta eksperensiando e goso aki ku ta disponibel den Kristu? Nò! E bida Kristian ta un lucha; semper e tabata, semper e lo ta. I hopi yu di Dios ta laga e lucha aki stroba nan di tin e goso ku ta pertenesé na e yunan di Dios.


Konklushon

Tantu eksperensia komo Skritura ta siña i demostrá e realidat di loke Augustinus a bisa, ora el a bisa Señor: “Tin un goso ku no ta wòrdu duná na e inkrédulonan, pero na esnan ku stima Bo pa ken Bo ta, kende nan goso Abo mes ta. I esaki ta e bida felis, pa regosihá na Abo, di Abo, pa Abo; esaki e ta, i no tin niun otro” (Confessiones).

10 views0 comments