“Dios ta Morto, i ta Nos a Mat’é”

Updated: Aug 2, 2019



Ta bèrdat ku Dios ta simplemente un produkto di nos imaginashon, meramente un fantasia ku nos mes a krea?


Na Mart 2009 e fundashon Freedom From Religion a gasta $2100 pa seis propaganda ku mester a aparesé riba 50 bus na Madison pa un periodo di dos luna. Kada propaganda tabata kuestioná religion òf duna motibunan pa no kere. Un sita for di e aktris Butterfly McQueen tabata bisa asin’aki, “Manera mi antepasadonan ta liber for di sklabitut, ami ta liber for di e sklabitut di religion.” E Iglesia Pilgrims Covenant Church na Monroe, a respondé bek dor di hasi propaganda riba 11 bus, i sita Salmo 14:1, “E bobo a bisa den su kurason: ‘No tin Dios.’”


Feuerbach, Freud, i Nietzsche tokante e Kreashon i Morto di Dios

Ku e rechaso di tur loke ta wòrdu yamá religion, hopi ta rechasá tambe e eksistensia di Dios mes. E filósofo Aleman Ludwig Feuerbach tabata unu di e proponentenan prinsipal di e pensamentu ku Dios ta un produkto di hende su imaginashon. Feuerbach tabata siña ku pa motibu di su miedu di morto, hende a krea Dios dor di su propio imaginashon.


Sigmund Freud, e tata di sikoanálisis, tambe tabata mira Dios komo un kreashon di hende. Freud tabata siña ku tur mucha hòmber ta krese ku e deseo pa tene relashon ku nan mama, kua ta hasi nan yalurs di nan tata i ta krea den nan un odio pa nan tata. E idea apsurdo aki ta karesé di un base evidensial, sinembargo el a hiba Freud na e pensamentu, ku pa motibu di e hòmber su sintimentu di kulpa pa e echo ku e ta odia su tata, i pa motibu di su miedu di naturalesa, e hòmber ta hasi e naturalesa dios, i ta personifik’é den un Dios Tata. Ku otro palabra, Dios ta simplemente un imaginashon di hende.


Un di e problemanan ku e pensamentu aki ta, ku e no ta splika kon e Dios di Beibel, un Dios santu, hustu, i puru, por a sali for di e imaginashon di hende, kua di naturalesa ta inkliná na hasi maldat. E apologista R.C. Sproul a refutá e ideanan di Feuerbach i Freud ora el a splika ku niun hende no ta deseá e Dios di Beibel, un Dios ku ta prohibí sierto kosnan ku mashá nos ta deseá na hasi. Esaki ta splika dikon den por ehèmpel mitologia Griego i Romano, nos ta haña ku e diosnan tin defisiensianan moral; e diosnan aki si tabata produkto di e imaginashon korumpí di e ser humano.


E filósofo Aleman Friedrich Nietzsche, tabata siña ku Dios ta morto, i ku tur balornan tradishonal i bíbliko a muri kuné. Den e palabranan di su konosido personahe fiktisio, E Hòmber Loko, e konosido filósofo ateista, a bisa asin’aki, “Mi ta buskando Dios! Mi ta buskando Dios! Unda Dios ta? Ami ta bisa boso. Nos a mat’é – abo i ami. Dios ta morto, i ta nos a mat’é.”


Na aña 1886 el a skirbi lo siguiente, “E evento di mas grandi di e último tempunan, esta ku ‘Dios ta Morto,’ ku e kerensia den e Dios di Kristianismo ya no por ser mantené mas, ta kuminsá tira su promé sombranan riba Europa.”


Fyodor Dostoevsky i e Resultado di e Morto di Dios

E eskritor Ruso Fyodor Dostoevsky, aptamente a nota e resultado di e filosofia di ateismo, ora el a bisa , “Si Dios ta morto, anto e ora ei tur kos ta permití.” Nietzsche tabata siña ku loke mundu tin mester ta supermen, esta super hende, kendenan tin e kurashi pa krea nan propio balornan. Ta hopi probabel ku e ideanan aki a influensia Adolf Hitler, i a form’é den un di e personanan mas teribel, i korumpí ku mundu a yega di mira.


Ateismo ta falsu i e no ta funshoná, pasobra e resultado lógiko di ateismo ta relativismo moral. I niun nashon, niun sosiedat, niun famia, niun persona no por funshoná adekuadamente sin ta someté na un Lei Moral apsoluto. Ora relativismo moral poderá di nos sosiedatnan, inmoralidat ta wòrdu tolerá, impuresa ta wòrdu tolerá, sensualidat ta wòrdu tolerá, idolatria ta wòrdu tolerá, brueria ta wòrdu tolerá, hostilidat ta wòrdu tolerá, bringamentu ta wòrdu tolerá, yalursheit ta wòrdu tolerá, envidia ta wòrdu tolerá, buracheria ta wòrdu tolerá; i no solamente tolerá, nan ta wòrdu aseptá, te asta enkurashá. No tin nada inherente malu mas den nan; ku nan ta malu òf no ta algu ku kada persona tin di disidí pa nan mes.


Si bo ke sa kon e Lei Moral ta mustra riba e eksistensia di Dios, klik akinan.


Konklushon

Dios, e úniko i berdadero Dios, Kreador di shelu i tera, e Dios di Beibel, difinitivamente no ta un produkto di nos imaginashon. Nos naturalesa mes komo ser humano ta prevení nos di krea un Dios kompletamente santu i hustu, i kende ta repudiá i kondená nos plasernan karnal i mundano.


Pregunta

Nietzsche a bisa “ku e kerensia den e Dios di Kristianismo ya no por ser mantené mas.” Kon abo lo a kontestá e ponensia aki?

13 views0 comments