Dios ta Kulpabel pa e Kaida di Adam i Eva?

Updated: Aug 2, 2019



Siendo ku Dios sa tur kos, E tabata sa tambe ku Adam i Eva lo a bai desobedesé i kome tòg for di e palu di konosementu di bon i malu? Pues, e echo ku Dios a krea e palu aki i poné den e hòfi, no ta hasi Dios kulpabel pa e kaida di Adam i Eva den piká?


Dios ta Kulpabel?

Den Génesis 2:9 nos ta lesa lo siguiente,


“I for di suela SEÑOR Dios a hasi nase tur palu ku ta agradabel pa bista i bon pa kuminda; tambe e palu di bida meimei di e hòfi, i e palu di konosementu di bon i malu.”


Mas abou, den vv.16-17 nos ta lesa,


“I SEÑOR Dios a ordená e hòmber, bisando: ‘Di tur palu di e hòfi bo mag kome libremente, ma di e palu di konosementu di bon i malu lo bo no kome, pasobra e dia ku bo kome di djé, lo bo muri sigur.’”


For di Skritura nos ta komprendé ku Dios ta omnisiente; ku E sabi eksaktamente tur loke lo bai sosodé den futuro. Siendo esaki e kaso, nos por komprendé tambe ku Dios tabata sa bon bon for di delantá ku Adam i Eva lo a bai desobedesé i kome tòg for di e palu di konosementu di bon i malu. Pues e pregunta ku ta surgi ta e siguiente: Sabiendo esaki, dikon Dios a pone e palu aki den e hòfi? Riba esaki nos por kontestá: Wèl, pa tèst Adam i Eva. Ma e kontesta aki tambe ta lanta un otro pregunta: Dikon tèst nan, si Dios, siendo omnisiente, for di delantá tabata sa kaba kiko lo a bai ta e resultado di e tèst?


E Motibu pa e Palu i e Prohibishon

Nos tin di komprendé ku Dios a krea e ser humano pa obedesÉ i stim’É di nan propio boluntat. Pues pa no forsanan na obedensia, Dios mester a krea tambe e posibilidat pa hende desobedesé. E posibilidat aki tabata den forma di e prohibishon pa kome for di e palu di konosementu di bon i malu.


E ser humano ta un kriatura kompletamente liber pa skohe. Un outor deskonosí a skirbi asin’aki: “Bo por skohe tur momento, no importá kiko a pasa.” E polítiko Merikano William J. Bryan a bisa, “Destino no ta un asuntu di chèns, e ta un asuntu di eskoho.” Nos kada un por skohe entre bon i malu, entre obedensia i desobedensia, entre bida i morto; Adam i Eva a skohe pa morto.


Dikon Adam i Eva no a Muri Mesora? Fayo di Dios?

Esaki ta hiba nos na un otro pregunta mas ku nos tin di konsiderá: Dikon Adam i Eva no a muri mesora? Den kapítulo 2 di Génesis, versíkulo 17, Señor Dios ta bisa e hòmber: “Di e palu di konosementu di bon i malu lo bo no kome, pasobra e dia ku bo kome di djé, lo bo muri sigur.” Den su komentario riba Génesis pa e International Critical Commentary Dr. John Skinner, refiriendo na e kastigu di morto ku Adam i Eva mester a sufri, ta bisa asin’aki,


“E menasa no a wòrdu kumplí. ... E splikashon simpel ta ku Dios, teniendo kuenta ku e sirkunstansianan di e tentashon, a kambia Su propósito i a modifiká e kastigu.”


Den esaki señor Skinner ta totalmente robes. Niun ora so Dios no a kambia Su propósito òf modifiká e kastigu. Ma kon nos ta splika anto e echo ku Adam i Eva no a muri e dia ei? Tin porloménos dos manera ku nos por splika esaki. E promé ta hasi referensia na e idioma Hebreo.


Den 1 Reinan 2:37 rei Salomon ta atvertí Simei ku dia e sali for di Yerusalèm i krusa Roi Kedron, e lo muri sigur. Ni e teksto aki, ni Gen. 2:17 no ta impliká ku e morto mester a tuma luga riba e mes dia di desobedensia. Loke e tekstonan i e idoma aki ta hasi, ta mustra riba e siguransa di e kastigu di morto, kua a resultá for di e desobedensia ku a tuma lugá riba e dia ei.


Tin un di dos manera ku nos por splika dikon “supuestamente” Adam i Eva no a muri mesora e dia ku nan a peka. Skritura ta papia di varios tipo di morto:


1. Morto físiko (separashon entre alma i kurpa di hende)

2. Morto spiritual (kiebro den e kontakto i relashon entre Dios i hende)

3. E di dos morto (separshon for di Dios totalmente i eternamente)


Na momento ku Adam i Eva a peka, mesora nan a muri spiritualmente (Efe. 2:1), ma eventualmente nan a bin muri tambe físikamente.


Konklushon

Dios no ta kulpabel pa e kaida di Adam i Eva den piká. Señor a krea e ser humano pa obedesÉ i stim’É di nan propio boluntat. Pues pa no forsanan na obedensia, Dios mester a krea tambe e posibilidat pa hende desobedesé. E posibilidat aki tabata den forma di e prohibishon pa kome for di e palu di konosementu di bon i malu.

26 views0 comments

Recent Posts

See All